關於我們
資訊安全
幫助中心Blog
EN
 / 

裝修慳錢10式 置業新手必睇

blog.added_on 28-10-2018

年尾係裝修旺季,皆因唔少剛買樓嘅業主都趕住過年前入伙。擁有屬於自己同另一半嘅小蝸居,係邁向幸福美滿第一步。成功買樓後,荷包嘅資金可能已所餘無幾,到裝修階段,難免要慳得就慳。

喺香港,裝修一個300餘平方呎的小單位,價錢普遍由十幾萬至幾十萬元不等,但坊間裝修及室內設計資訊繁多,選用不同嘅設計風格、物料及裝修公司,價錢可能差天共地,首次裝修嘅朋友可能不知從何入手。以下建議10招慳錢心得,助大家裝修前好好規劃,以免要洗冤枉錢。

teal and pink paints on 圖:Unsplash

貨比三家

photo of flat screen television 圖:Unsplash

買樓的時候,相信你已睇過多個單位先作決定,裝修亦都一樣要。唔同裝修公司,對相同單位及要求,報價可能差距極大。因此,請花多點時間,聯絡多幾位師傅或設計師上門報價,貨比三家。你不妨問問親友能否向你推介可靠嘅裝修或設計公司,好過自己盲摸摸。

以下係香港幾個熱門裝修報價平台:
SPACEPLAN
Call 師傅
好師傅
師傅到
師傅GO
裝修佬
裝修易

報價單越詳細越有保障

部份較懶嘅師傅,報價時可能簡單講一句:「30萬搞掂。」要保障自己,你必須向佢索取詳盡報價單,說明每項細節,如廚櫃呎數係多少、每項裝修環節是否連工包料、邊啲裝修材料要自購、油漆用邊款、電掣數目、保險安排、完工日期等。自僱裝修師傅及小型公司嘅合約或做得較簡陋,請堅持要求佢哋加入詳盡細節,先簽合約及交付訂金,免得開工後有爭拗。

設計師VS裝修師傅

圖:GIPHY

聘請設計師主理裝修工程,好處係有人幫你處理設計、選擇物料及監督工程等複雜工作,壞處當然係貴。一般而言,設計師安排職員上門度尺後,會製作初步草圖及報價單,確認後再提供提供彩色3D模擬效果圖,每每要修改兩、三次先能夠定稿。因此,由收樓到真正開始裝修,可能已花咗約一個月。

如果你有較多時間、精神及裝修知識,以及對設計理想家居胸有成竹,不妨直接聘請裝修師傅,再由自己擔當室內設計師。裝修師傅通常唔會提供3D設計圖,未必會給予太多設計建議,但佢哋一般對裝修物料、水電等有豐富知識,最重要係你可以節省一大筆設計費。

真係要用入牆傢俬?

IKEA傢俬價廉物美,深受年輕人喜愛。圖:IKEA

近年獲傳媒報道嘅家居設計常常有一個共通點,就係用上大量入牆傢俬,其美名係增加收納空間,但訂造入牆傢俬比買現成貴一大截,亦會減少室內空間感。想一想,你係真咪真係要用盡家中每一呎來增加收納空間?喺不足一米闊嘅走廊安裝入牆櫃,只會阻礙出入;地台床可收納大量雜物,但每次開關櫃門都頗麻煩;在窗台訂造儲物櫃,會阻擋景觀,不如將窗台設計成優雅小茶座。為儲物而煩惱嘅你,不妨趁搬屋來一次「斷捨離」,減少不必要的雜物,釋放家居空間感,勝過一屋都係儲物櫃。

網購海外水貨

喺香港購買行貨外國名牌電器、廚具、水龍頭、床褥等,價錢往往比喺原產地購買貴好多。因此,香港唔少精明網友選擇網購水貨,唔少外國公司都有提供直送或轉運服務,以大熱嘅Dyson吸塵機為例,喺英國或德國網站訂購,即使計埋運費,都隨時比喺香港買比足一半。但要留意的是,網購的水貨產品在香港未必有保養,須衡量風險;電力規格亦可能有差異。

北上尋寶

也許未必人人喜歡中國製造,但事實上香港市面買到嘅裝修材料,好多都係中國製造,就連訂造傢俬亦幾乎全部係中國造好後,先運到香港組裝。反正避無可避,不如直接北望神州。淘寶網當然係最簡單快捷,另外好多人會親身到深圳田貝四路等熱點選購裝修材料及傢俬。喺大陸買地磚、潔具和燈具等現成產品,質素大致跟香港市面相若,較少「中伏」,但要度尺訂造嘅廚櫃或衣櫃等則不時聽聞貨不對辦嘅案例。另外,大陸嘅傢俬店安排嘅安裝師傅,未必可以喺香港合法工作,消費者可能誤請「黑工」。

開倉博覽

即使喺香港買傢俬和電器,亦有好多慳錢門路。最方便嘅方法係買店舖陳列品,但唔人人接受得到。你不坊Google一下有冇傢俬店或電器品牌正進行開倉促銷,如果剛好有傢俬博覽會,相信可搵到唔少特價產品。

把握淡季講價

john crist comedy GIF by Interstellardesignz

圖:Giphy

受傳統文化影響,好多人喜歡在農歷新年前完成裝修,以便過年時新居入伙。因此,每年年尾都屬裝修旺季,裝修公司生意多,業主想講價自然較難。相反,過年後步入淡季,裝修公司開價或冇咁狼死,甚至減價促銷,有利消費者殺價。

上手裝修物盡其用

有足夠資金做全屋裝修固然最好,但要慳錢的話,好多時只能退而求其次,保留上手業主部份裝修,物盡其用。如果樓齡唔太舊,可毋須重新鋪設水電;唔起眼嘅位置如牆角插頭、抽氣扇、房門鎖、廚廁天花射燈等,換來換去分別未必太大。

考慮長遠維修

water fix it GIF

圖:Giphy

完成裝修後,你同家人可能會住上十年八載甚至更耐,因此必須考慮日後嘅維修開支。如果你住喺香港的東面或南面近海地區,濕氣重在所難免,油漆及衣櫃等應選用防潮性較好嘅物料;選用智能燈具及家電時,要考慮日後會否難以購買替補零件及維修;購買嵌入式電器或爐具時,宜選擇大路嘅牌子及尺寸,日後更換時也不用修改廚櫃。

裝修時,你應注重材料及產品嘅品質,以降低日後嘅潛在維修費,做到「貴買平用」,長遠反而節省不少。

推薦文章: 買樓VS租樓:5大重要考慮因素 理想人生由家出發:Planto上車攻略

關於Planto

Planto係一個創新嘅智能個人理財及記賬應用程式,設iOS及Android版本版本。本公司於香港大學創新及創業中心組成,係一間正急速發展嘅初創企業,我哋得到數碼港及一批來自香港、英國及加拿大嘅投資者及資深顧問支持,助香港用戶向買樓、進修等人生目標進發。請到www.planto.hk了解更多。

請即Like Planto facebook專頁及追蹤Instagram,或到頁底留底電郵訂閱電子通訊,接收我哋最新消息及第一手理財資訊!

準備實現人生大計?

Planto app已推出iOS及Android版本!馬上登記,為實現理想邁出第一步。