關於我們
資訊安全
幫助中心Blog
EN
 / 

【職場新手必讀】香港畢業生常犯嘅6大理財錯誤

blog.added_on 19-08-2018

大學或大專畢業係人生重要里程碑,搵到第一份全職工作、賺到第一份糧後,意味着你要正式開始獨立理財,自主地將薪金分配喺儲蓄、投資、家用、娛樂、旅遊等不同項目。假如個人財政係一盤生意,你當然希望自己能夠賺錢,而唔係蝕盤貨。但點樣先可以管好自己盤數?以下同你分享6個職場新鮮人應避免嘅錯誤:

1. 缺乏全盤目標與計劃

學周星馳經典對白話齋:「做人如果無夢想,同條鹹魚有乜分別?」工作賺錢,並唔係只為生存,你必須有夢想、有目標,先有動力發奮。儲錢亦一樣,請問問自己,我啲錢儲嚟做乜?為咗讀PHD?去旅行?買樓?買車?目標未必要好偉大,但至少要清晰明確,唔會渾渾噩噩。

利用Planto,你可以為旅遊、進修、置業等目標做好預算。設定好人生目標後,Planto馬上幫你計好每月儲蓄目標,為你確立理財方向。Planto更可追蹤開支,助你檢討支出是否用得其所,從而改善理財。

Wallethacks網站博客Jim Wang提出個人財政預算嘅黃金比例為「20-30-50」。每次出糧後,馬上儲起20%,住屋開支控制喺30%以下,其他洗費包括家用、電話費、娛樂、食飯等,合共不可超過50%。月儲20%,對香港人嚟講或者太少,你可按個人收入、習慣與計劃作出調整,最重要係確立屬於你個人嘅第一個儲蓄計劃,向目標踏出第一步。

2. 太早搬出嚟住

大學生喺住hall生涯習慣自由自在,或唔再想與家人同住,惟香港租金騰貴,租住市區一個300呎至400呎小單位,索價通常過萬蚊,大學畢業生平均起薪只有約$15,000,一個人租樓,幾可肯定用咗一大部份糧,即使二人合租,租金支出亦可能超過收入一半,超出Jim Wang建議嘅30%。對大多數畢業生而言,唯有租住較平嘅共居空間或劏房,先可能維持到儲蓄目標。 搬出嚟住無非為自由,但若此舉反而令你受租金束縛,豈非本末倒置?如果,你家人能為你提供棲身之所,請好好考慮繼續與家人同住,既慳番租金,每月亦可向父母上繳較高金額嘅家用,報答養育之恩。

3. 喺娛樂與消遣花太多錢

食一次自助餐花費$500,買一部新手機要$7,000,去日本玩一轉要過萬蚊,呢啲享受全部索價不菲。初嘗自主理財嘅你,難免心癢難耐,咩都想試一試,如是者,你有機會入不敷支。

要維持work life balance,適當嘅消遣娛樂係必要的,但緊記量入為出。想放鬆心身,你唔係事必要出國,香港嘅自然風光從來不輸鄰近亞洲國家,留港行山,到海灘暢泳,都係平價享受。手機有冇必要年年換?蘋果預期iPhone使用壽命為3年,你未必需要太早換機,如果嫌續航力不足,換粒電池會係較環保做法。飲食方面,有時候放棄豪飲豪食,走進隱世平民小店,品嘗風味地道嘅本土美食,亦係廉價而寫意嘅滋味。

想精打細算地計劃旅行?可睇睇以下連結:
擇日搶特價機票 飛日本、泰國點先最抵?
每天慳錢多一些 日本離我又近些

4. 買過多保險產品

你身邊總有幾個朋友或舊同學,忽然約你聚舊,然後推銷保險。買保險,有助你喺發生突發事故、失去主要收入來源時,得到基本生活保障,但購買前要做足功課,分辨對你最有用嘅產品。

譬如說,廿幾歲嘅你,或未必要咁早開始供年期長而保費較貴嘅儲蓄人壽保險;相反,危疾保險越早買越平,可優先考慮;醫療保險方面,好多公司都有提供最基本保障,你要衡量是否夠用。買有投資成份嘅保險時,記得細閱條款,了解紅利是否保證、提早cut單會損失幾多等重要事項。

請緊記量入為出,唔好為助挨義氣幫朋友開單,而買下你並唔需要嘅保險產品。如果朋友正不斷游說你買保險,而你剛好有需要,請評估一下呢位朋友是否誠實可靠,以及會否喺保險業長期發展,避免你日後有需要claim賠償時,先發現條款同你理解嘅「貨不對辦」,如到時朋友已經離職,你嘅保單可能淪為冇人跟進嘅「孤兒單」。

5. 忽略MPF戶口

你可能喺過去做暑期工時,已經擁有幾個強積金戶口。戶口金額太少,或令你大感食之無味,你甚至可能連自己名下有幾多個強積金戶口忘記得一乾二淨。儘管呢一刻你嘅強積金賬戶金額雖少,亦不失為職場新鮮人初體驗投資嘅好機會,只要妥善管理、日積月累,他朝你會擁有一筆可觀退休金。

如果你想確認自己擁有幾多個強積金戶口,請填妥並向積金局遞交「個人帳戶資料查詢表格」,查清賬戶後,你可把現有嘅多個戶口重新整合,以方便管理,方法係填妥「計劃成員整合個人帳戶申請表」,交畀你所選定嘅受託人,填表過程或有少少繁複,你嘅基金經紀會提供指引。Planto日後亦會另文介紹強積金小貼士。

6. 管理信用卡不善

開始全職工作、擁有收入證明後,有人會鬆毛鬆翼,申請多張新信用卡,瘋狂購物,滿足學生時代抑壓多年嘅購買慾。但用信用卡簽賬必須準時還款,任何遲找卡數嘅記錄,都會喺你個人信貸記錄留下5年烙印,他朝要向銀行申請按揭貸款,亦可能受影響。畢業生擁有一至兩張信用卡已經足夠,否則申請得太多,張張還款日期唔一張,會增加你忘記還款嘅風險,形同掟蕉皮落地畀自己踩。如果你真係擁有多張credit card,建議你使用Planto,自動提醒你喺還款日前準時找卡數。

關於Planto

Planto於香港大學創新及創業中心組成,係一間正急速發展嘅初創企業,我哋得到數碼港及一批來自香港、英國及加拿大嘅投資者及資深顧問支持,助香港用戶向目標進發。請到www.planto.hk了解更多。如果對想接受更多理財資訊,請到頁底留底電郵,訂閱電子通訊;亦歡迎like我哋facebook,緊貼最新消息。

準備實現人生大計?

Planto app已推出iOS及Android版本!馬上登記,為實現理想邁出第一步。