關於我們
資訊安全
幫助中心Blog
EN
 / 

聽媽媽的話未必啱?4個可能過時嘅金錢觀念

blog.added_on 15-10-2018

「食多啲蔥,大個會聰明啲。」
「我幫你儲起啲利是錢,大個仔先畀番你。」
「吞生果核,頭頂會生樹。」

每個小朋友都從父母無數善意謊言中長大。關於個人理財,每位爸爸媽媽都身體力行,同我哋分享咗好多經驗。雖然父母「食鹽多過你食米」,但正所謂「時光可變,世界可變」,許多道理亦隨時代變遷。

以下呢幾個金錢觀,你可能細細過已經聽過,但今日或許已不合時宜。

#1 「千祈唔好申請信用卡」

圖:Unsplash

你有冇試過畀媽媽發現你申請信用卡,然後痛罵你「大花筒」?上一輩認為信用卡係先洗未來錢,容易碌爆卡,令人陷入萬劫不復嘅債務深淵。

其實,信用卡好與壞,在乎用家有冇自制能力。冇錯,假如你無節制地胡亂洗錢,信用卡可以令你陷入險境。但對於精明消費者,信用卡幫到你儲積分、賺現金回贈、飛行里數、折扣優惠,着數多不勝數。

此外,現今網上購物盛行,擁有信用卡,你可以更加方便地喺HKTVmall、Ztore、Amazon、淘寶、App Store等網站購物。想去旅行?一卡在手就可以到Expedia、Agoda、Klook等網站預訂機票及酒店,毋須好似想當年咁,拎住叠現金去旅行社。

只要培養正確理財觀念,信用卡係你生活及理財嘅好幫手。

#2 「投資一定蝕死你」

圖:Unsplash

1973、1989、1997、2008……每代香港人,都無可避免曾經歷股災。呢啲慘痛回憶,令唔少人誓神劈願決心唔再沾心任何投資,有長者甚至唔信銀行,寧願將錢放入月餅罐再收落床下底。

不過,你遠離投資,通脹卻會找上門。「30年前一個菠蘿包幾毫字!」唔少長輩對此琅琅上口;即使你係90後,亦可能記得小時候一個麥當勞套餐廿蚊有找。因此,唔投資,你嘅儲蓄只會跑輸通脹。

美國有研究指,假設一個25歲打工仔年薪31.5萬港元(40,456美元),儲蓄為人工15%,如果佢投資股票市場,按過去40年平均回報及息率推算,到65歲退休時佢會擁有3,565萬港元(457萬美元);如果將錢放入銀行,會有991萬港元(127萬美元);如果將錢放喺床下底,就只得439.5萬港元(563,436美元)。

當然,世上冇零風險嘅免費午餐,無論炒樓、炒股票,或投資較穩定嘅債券、定期存款,以至管理你每月供緊係強積金,都要記得做足功課。

只要你開始儲錢及投資,喺複利率助長下,就會進入錢搵錢嘅循環。假設你每年儲蓄$50,000,以1年回報率5%計,首年獲利$2500。聽落似乎唔多,但只要持之以恆,每年重覆上述步驟,10年後本利和可滾到$660,339,比當初投放嘅本金多出16萬!早儲早享受,遲儲少幾球,呢個就係複利率嘅神奇威力。

#3 「唔好借錢/分期付款」

圖:Unsplash

老一輩人理財審慎,堅守量入為出原則,就連買樓都希望full paid,或將揭按成數做到最低。呢種理財態度絕對安全,但喺現今社會可能令人錯失機會,較理想做法係喺確保有能力還款情況下,適當地借貸。

以買樓為例,雖然近月香港加息,但相比起1980、90年代利息曾高踞十幾廿厘,現時仍屬低息,借錢買樓嘅利息支出相對較低。更何況香港樓價貴絕全球,要full paid分分鐘要不吃不喝19年。喺買手機、電器時,雖然多數人未致於要借錢,但唔少商戶或銀行都會提供免息分期。爺爺嫲嫲嗰代會鬧你「冇錢就唔好買」,但其實分期付款亦可以係一種周轉策略,助你保留更多資金,用作投資或實現其他目標。

有時候,低成本借貸可以為你帶來投資彈藥。如各大銀行有推出稅貸或其他低息貸款,如果你有信心借款後,能夠用其他投資方式「錢搵錢」賺得更多及順利還款,亦可喺衡量風險後考慮借錢。記住,借錢嘅大原則必定係「還得到先好借」。

#4 「網上買嘢呃人㗎」

圖:Unsplash

現今世代,衣食住行樣樣都可以喺網上辦妥,HKTVmall、Ztore、淘寶、Amazon、Uber、FoodPanda等網購或網上服務平台,我哋都耳熟能詳,但仍有唔少長者對此感到戒懼,擔心網購時會遇到騙子。

但其實,具信譽嘅本地或海外網購平台,一般都列明退款機制或對買家嘅保障,畀咗錢但收唔到貨嘅機會少之又少。而且網上交易會有銀行付款記錄,比起喺實體店或其他場合遇到騙子嘅風險唔會特別高。

網上購物仲有好多好處,包括節省購物時間、唔使自己搬運、享用到信用卡儲積分或其他優惠;喺外國網站或代購網買外國產品,好多時比喺本地實體店更平,產品種類亦更豐富。

只要睇清楚產品資料、送貨及銷售條款,長輩們都可以成為精明網購消費者。

關於Planto

Planto於香港大學創新及創業中心組成,係一間正急速發展嘅初創企業,我哋得到數碼港及一批來自香港、英國及加拿大嘅投資者及資深顧問支持,助香港用戶向買樓、進修等人生目標進發。請到www.planto.hk了解更多。

請即Like Planto facebook專頁及追蹤Instagram,或到頁底留底電郵訂閱電子通訊,收接收我哋最新消息及第一手理財資訊!

準備實現人生大計?

Planto app已推出iOS及Android版本!馬上登記,為實現理想邁出第一步。