關於我們
資訊安全
幫助中心Blog
EN
 / 

習慣主宰人40%行為!4招助你培養儲錢習慣

blog.added_on 23-10-2018

為何儲錢總係易知難行?過去有銀行調查指,香港年輕人每月平均只儲到薪金22%,過半數人冇信心能完成儲蓄目標。

你欠缺嘅,可能係一套好習慣。

美國杜克大學學者研究指,人類40%行為皆出於習慣,因此,正確嘅理財習慣,對我哋生活模式以至財富管理影響至深,係邁向豐盛人生嘅重要一步。但點樣先可培養儲蓄習慣,擺脫「月光族」?

#1 訂立儲錢目標

man wearing white long-sleeved shirt on air photo
圖:Unsplash

目標係培養習慣嘅起點,當心中擁有渴望實現嘅目標,就有熱情與動力追求自我改變。「我點解要儲錢?」「儲到錢可以做啲乜?」由買樓、結婚、生B等人生大事,以至進修、買車、旅行、換手機都可以係儲錢嘅理由。

假如你未搵到儲錢嘅動力,亦不妨以儲蓄應急基金為目標,以應付突如其來嘅狀況。博客Suze Orman建議人們要儲到8個月生活洗費,你可按個人情況調節目標,最重要嘅係,你要建立儲蓄目標,否則只會茫茫然不知自己為何事慳錢。

#2 由細金額開始,持以以恆地每日儲錢

animation saving GIF by MOOT
圖:Giphy

習慣可從日常實踐中不斷鞏固及增強。美國萊斯大學學者Utpal Dholakia引述心理學家Wendy Wood及Dennis Rünger研究指:「關聯及獎勵學習機制抓着習慣形成嘅緩慢、漸進本質,從而鞏固習慣。每重複做一件事,與程序記憶相關嘅認知及神經機制都會出現細微變化… 情境線索與回報之間嘅認知連結續漸增強,當情境線索再次受到鼓勵,人們就預備好做相同嘅事。」

因此,Utpal Dholakia認為,哪管你每日只儲到1、2蚊,你都必須儲錢,令儲蓄成為你腦海中牢不可破嘅信念及習慣。如果一開始就將目標定得太高,你可能會因無法達標要感到受挫。所以,你最好由較低門檻起步,成功後才慢慢調高難度,由每月儲500蚊,成功後,逐步提升為1,000蚊、2,000蚊、5,000蚊。

#3 購物前,請三思與取捨

Confused Math GIF by CBC
圖:Giphy

你想個個禮拜食自助餐,又想儲錢去旅行,但若然收入不足以應付兩者,你就要學懂取捨。關鍵係,每次購買前都要撫心自問:「我係咪真係有需要買?係咪真係要即刻買?」戒除幾項日常生活中不必要洗費,你可能只需3個月就儲夠錢去日本

假設你想買一個名牌新手袋,事前請問問自己以下三個問題:

「買咗之後,會唔會影響我儲錢目標?」如果買手袋會影響你實現目標,你係咪仍然甘願去買?

「我可唔可以等多兩日先買?」有時候,購物慾只係一時衝動。不妨畀自己兩日冷靜期,衡動過後你或更了解自己真正需要。

「呢個袋等同我3日人工,係咪真係物有所值?」計一計你要付出多少時間及努力,先至買到呢件物件,有助衡量呢件物件對你嘅價值。

#4 製作個人預算及記錄開支

如果你已試過努力儲錢,但錢總係不知不覺地溜走,咁你需要一套有系統嘅理財方式。除咗用excel或紙筆記賬外,最簡單嘅方法用手機安裝個人理財應用程式,訂立每月預算及儲蓄目標,然後記錄日常開支,再透過應用程中嘅分析報告,檢討邊啲開支係用得其所、邊啲係揮霍消費。

譬如Planto app設有「每月重複開支」分析功能,可列出你每月繳交嘅電話費、Netflix、iCloud、健身會藉等定期開支。你可從中檢視邊啲係你唔再需要嘅訂閱服務,節省不必要支出。

幾耐先可養成儲錢習慣?

到底要堅持幾耐,先可令儲錢成為生活習慣?坊間流行一個所謂「21日效應」嘅說法,起源於1950年代整形醫生Maxwell Maltz嘅主張,指出病人普遍要至少21日先適應新嘅義肢。但心理學界認為呢個單靠個人觀察所得嘅理論太粗疏。

倫敦大學學院健康心理學研究員Phillippa Lally安排96人進行為期12周嘅實驗,參加者選擇培養「邊食飯邊飲水」、「晚飯後去跑步」等習慣,結果發現人們養成習慣需時18日至254日,而平均需要66日,可見建立新習慣所需時間係因人而異。

喺養成儲錢習慣嘅過程中,外在引誘、突發事情、個人意志等因素,都可能令你目標不似預期。但無論如何,時間係孕育新習慣嘅最佳催化劑,只要持之以恆,終有一日儲錢會成為你生活習慣一部份。當儲錢成為你自然不過嘅行為,你就再毋須為慳錢感到爭扎及苦惱,無痛擺脫月光族!

關於Planto

Planto係一個創新嘅智能個人理財及記賬應用程式,設iOS及Android版本。本公司於香港大學創新及創業中心組成,係一間正急速發展嘅初創企業,我哋得到數碼港及一批來自香港、英國及加拿大嘅投資者及資深顧問支持,助香港用戶向買樓、進修等人生目標進發。請到www.planto.hk了解更多。

請即Like Planto facebook專頁及追蹤Instagram,或到頁底留底電郵訂閱電子通訊,收接收我哋最新消息及第一手理財資訊!

準備實現人生大計?

Planto app已推出iOS及Android版本!馬上登記,為實現理想邁出第一步。