關於我們
資訊安全
幫助中心Blog
EN
 / 

每天慳錢多一些 日本離我又近些

blog.added_on 13-08-2018

有人話,香港年輕人去少啲日本,就可以成功買樓。計我話,呢種諗法未免睇得去日本太過容易。睇住富二代朋友周圍打卡,作為一位窮L,難免想悲呼一句「哪有錢?!」要儲錢去旅行,可以由改變每日生活習慣做起,小數長計,可慳返唔少。配合特價機票,你會發現,原來日本並唔係想像中咁遙遠。

精選慳錢套餐

A餐 戒煙

吸煙危害健康,而且仲好貴,以一包煙大約$55計,每日食一包,一個月跌咗$1,650。所以,聽政府話,戒咗佢啦,食得多會陽萎㗎!

假設你完全戒煙,每月節省: $55 x 30日 = $1,650

B餐 帶飯返工

喺中環、灣仔食一個lunch,閒閒地洗$40、$50,如果你屋企每晚都有淨餸,公司又有微波爐,你午餐即刻變零成本。

假設你每巴帶飯番工,每月節省: $40 x 22日 = $880

C餐 戒零食咖啡

好多人工作時都有鋪零食癮,食兩包糖或薯片都唔見$20,如果你係Starbucks粉絲,日日飲杯$40咖啡都咪話唔肉赤。一個茶記下午茶索價$30,其實可以忍口。

假設你每日用30蚊買零食或咖啡,今後每月一半日子慳番唔食,每月節省: $30 x 15日 = $450

D餐 早起

你身邊總有一兩位同事,經常賴床、瞓到唔知醒,然後焗住飛的番工。當你由九龍西搭去九龍東,一程要百幾蚊,從新界嘅朋友搭岀市區,望住個咪錶不停跳,你會怨恨自己點解今朝同周公纏綿咁耐。

假設你搭的士番工要120蚊,一個月搭4次,今後大撤大悟不再賴床,每月節省: $120 x 4次 = $480

E餐 慳家gathering

放工後,偶然同朋友食吓飯、飲吓嘢,係減壓嘅好方法,想慳錢唔一定要做宅男,但可選擇食平啲。食開$300一餐放題或鋸扒嘅你,不妨偶爾去大牌檔歎下豆腐火腩飯,感受男人嘅浪漫,又或者好似中學時咁,幾個傻仔去麥記柴娃娃hea一日,年中慳番唔少。

假設你過往gathering月花$2,000,今後改去平民餐廳,洗少一半,每月節省: $2,000 / 2 = $1,000

F餐 Cut晒不必要服務

Netflix、Spotify、gym membership…樣樣都係錢,如果你用唔晒咁多服務,不如乾脆一點cut咗佢。

假設你平時一個月用$500訂閱各式各類服務,今後cut一半,每月可節省: $500 / 2 = $250。

如果你做足以上全部慳錢套餐,每月慳到$4,710!2至3個月夠平玩一轉東京或大阪。不過,你可能根本唔食煙,又或者嫌上述方法太過刻薄自己,不妨選擇性地只做B、C、E餐,每月可慳$2,330,3個月夠錢去台灣,半年夠遊日本。

想再慳多啲,你可以睇準最佳時機訂機票,即睇搶平價機票教學

儘管每個人嘅慳錢方法會按生活習慣有所不同,但以上例子說明,只要有恆心,每日一點一滴地慳錢,要儲到足夠旅費,其實唔係難事。想更有系統地儲錢去旅行?推薦你使用Planto,唔單只可按目的地、旅遊日期、機票及旅遊喜好,估算旅程開支,更可連結銀行戶口,方便睇實儲蓄及開支,一步一步地為旅程做好預算,從此唔使擔心唔覺意洗凸咗,打亂旅遊計劃。

關於Planto

Planto於香港大學創新及創業中心組成,係一間正急速發展嘅初創企業,我哋得到數碼港及一批來自香港、英國及加拿大嘅投資者及資深顧問支持,助香港用戶向目標進發。請到www.planto.hk了解更多。

如果對想接受更多關於旅遊計劃及理財資訊,請到頁底留底電郵,訂閱電子通訊。

準備實現人生大計?

Planto app已推出iOS及Android版本!馬上登記,為實現理想邁出第一步。